Prvi čips

 

Otac bi panulava najčešće u Lastovski kanal. Nas dicu i tetu bi isckrca na okolne male škoje da pribavimo nešto za izist. Ostavi bi nas na Lukovac ili Pržnjak Veli, Pržnjak Mali, Trstenik ili Gredicu. Nama je bilo svejedno jer nan je na svaken bilo puno lipo. Neka smo bili mali, svi smo jemali pošadu i znali smo kako u latenu poticu, jerbo ni bilo plastičnih kesa, skupjat puže grce i prilipke, oliti lumpare. Samo nebo zna koliko smo lumpara izili sirovih. A na svitu ni bilo bojega rizota od naših truda. Kad bi ga teta učinila i začinila kako triba.

A mi bi, dok je otac lovija, učinili cili krug oko škoja. Kad bi nan bilo jadno vruće, samo bi skočili u more, rasladili se i nastavjali daje. Da smo tada gledali film Ralje, vjerojatno nan ne bi palo na pamet skakat di smo skakali. Ali film je, na svu sriću bi puno kašnje. Pa smo ronili ko će dubje i plivali ko će daje.  Jer mi smo tad imali malo godina. Ja jedinica i mojih troje kužina. Nerazdvojni.

Za to vrime, teta se bavila nečin drugin. Vadila je iz grota vlasuje i nikako nisan razumila kako je ne opeku.  Od njih smo bižali ka od vraga da ih slučajno ne nagazimo. Ali teta je bila meštrovica o svega. A od njih je znala učinit čaroliju.

Kad bi došli doma, svi bi na trpezu stili svoju lovinu. Otac ribu, mi dica lumpare, grce i po kojeg raka kosmača, a teta vlasuje. Pa bi s njima, onako žutin i krakatin u procidušu da se lipo ocide. Onda bi ih uvajala u oštru muku i stivavala u vrilo maslinovo uje.

E, to je bi naš prvi čips. Slan i hrustav. Iz mora koje se bistrilo ka suza iz oka. Uz njih i bokun kruva bili smo zadovojni, siti i umorni. Opečeni od sunca i slani od mora, samo bi se izvrnili na slamarice prostrte po podu i do jutra nas ni bilo ni čut ni vidit.

Ni ovo nostalgija. Ovo su samo zapisi jednog vrimena koje san imala veliku sriću živit. I zato mi godinama kasnije,  čitanje Pustolovina Huckleberryja Finna, Toma Sojera ili Družbe Pere Kvržice ni približno ni bilo izazovno ni pustolovno ka ono moje, ka naše zajedničko  dičinje jer je ostalo teči u krvotoku. Kako onda tako i danas.

I odlučila san ih svih zapisat. One predškolske, školske i daje kako je već bilo.