Tempi passati

 




Plivali su svi. Ronili su svi. Maska na lice čak i ni bila pod obavezno. Disalica mi nepoznanica. Peraje vidila nisan.

Iz mora se jilo sve. Ono šta je danas delicija, nama je bilo često na pjatu.

Srdela je bilo na pretek. Pune mriže. Siti mi. Siti galebovi. Volili smo ih svakake. Frigane, u savur, pečene na gradele. Bile su vele i slasne. Danas takih više nima ni za ulovit ni za kupit.

Zato su bidni galebovi preselili na Karepovac i gradske kontejnere. Meni, navikloj ih gledat u prirodnom okruženju mora i gnježđenja po malin škojićima, ove slike paraju srce.

Teta je srdele solila u latenon važu. Red srdela, lipo posloženih, glava rep, red krupne soli. I tako skoro do u vrh važa. Na njega se stivava okrugli drveni poklopac i teški, teški  kamen. Da se lipo sprešaju. Da iziđe iz njih šta izić triba. I da sol uđe.

Kad bi došlo vrime za jist ih, svi smo se radovali. Teta bi ih lipo očistila, posložila u pjat i zalila s maslinovin i malo kvasine. Kvasine je uvik u nas bilo. Vino koje bi se ušpuntinalo odlagalo se u damjanu i od njega se ona činila. Štipala je i za nos i oči koliko je žestoka bila.

Slane srdele su nan bile ono šta je danas mnogima pršut. Mogli smo ih, mi dica, izist puno. Ali teta bi ograničila i rekla, ni van zdravo toliko. Fremajte jist.

Otac bi zna izronit kamenice. Bilo ih je teško otvarat. Jile su se sirove, s kapjon limuna.  I klizile su niz grlo.  Mi smo  činili mmmmm.

Sve češće se spominjala jesen i kako ću u skulu. U prvi razred. I veselila san se i ne.

To je značilo ostit tetu. Ostit kužine. Ostit slobodu. Ostit škoj.

To je značilo vratit se doma u Split. Izić u dvor kad dozvoli kućni red. To je bi mamin amen.

To je značilo da će mi krila bit podrezana.

Tega me, naka san bila mala, bilo najvišje straj. Jer leta bez krila nema.

Danas, kad se svega tega sitin, preplavi me teplina. Imala san silnu sriću. Bit dil tog otočkog vrimena. Ne ositit di prestajen ja, a di počinje sve šta me okruživalo.

Danas ne bi morskog ježa takla. Ni za živu glavu pošadon odlipila prilipka sa njegovog staništa. Ni u snu kamenon zgromila puža grca za nataknit ga na udicu. A tek probost raka kosmača, pecat, pojist sirovu kamenicu. Ali onda, onda nas je to hranilo. I na temeljima toga onda" izresla je jedna morska. Izvana, žena stina. Iznutra, mekja od paperja.

Ne prestaje s ovin poston poplava slika koje me svakodnevno opsjedaju. Beskrajno san zahvalna šta mi ni demencija ni alzheiemer nisu ni za petama. Šta se sićan svake slike, svakog mirisa. Svakog osjeta i svake emocije.

Moje tete više nima. Ali, zapravo ne znan ko je toliko živ ka ona. Ka i vrime koje sam s njon provela.

Primjedbe

Objavi komentar

Popularni postovi s ovog bloga

Karamela

Slika
  Nismo uvik bili samotnjaci u pra pradidovin pojatama. Deseljećima kasnije, preseljenjen u Valu, ja san bila ta koja je postala robinzonka. O tome tek nekad. Često smo obitavali u mistu. Ka dica smo guštali šetat ispod blaskih lipa, poznatog drvoreda dugog više o kilometra. Nosnice mi još pante taj opojni miris lipe u cvatu. Još više pante ladovinu koja je bila spas za svih. Iseljena rodbina iz Australije ponekad bi slala bajule s balama robe, rižon, mlikon u konzervi i svakakon drugon spizon koja se smila ukrcat i slat. Teta bi nan od tih bala šila kotulice. A mi, ka tri gracije, bi se šepurile volančićima, čipkon i drugin ukrasima. Uvik mi se parilo da su moje kotulice najlipše. I ka da me teta uvik tila raspoložit više od svojih. Da šta manje patin i mislin na mamu i oca. Ako nismo bili ispod lipa, igrali smo se na Plokati, trgu isprid crikve i u loži koja je bila siguran zaklon od kiše. Drob nan je zna kad je vrime od obida i ni nas tribalo zvat. Dotrcali bi uvik na vrime ...
Pročitajte više

Bez straja

Slika
  Još san uvik u pisanju predškolac. Kod tete na škoju. Tu je iznered bija red. Pravila nisu postojala jer se sve moglo. Bože, kakva razlika od škoja i mog života u gradu. Meni je škoj bija povremen i privremen dom. A grad, grad je bija naš pravi obiteljski dom. Sad, kad se osvrćen unazad, srce itekako pripoznaje koliko su pustopoljine bile moje pravo i iskonsko stanište. Pa bi nan teta uvalila košaru od pruća, koju je sama ispreplela, i rekla, hote naberite kupine. I nas četvero, bosonogi, krenili bi kozjon stazon kroz borovu šumu, uzbrdo i još uzbrdo da bi došli na veliku ravnicu. A s live i desne bande samo grmovi od kupina. Velih, zrilih, deboto crnih. I onda bi se najprin mi nazobali. I kad bi nan bilo dosta stivavali smo višak u košaru. Znali smo da će teta od njih učinit najlipji sok na svitu. Bilo je nabodenih stopala od kamenica, ogrebotina od kupinove drače, brljavih justi, po koji krvavi prst na nozi i na ruci, e, daaa, bilo je uboda čela i osa. Ali, ka dica smo već ogre...
Pročitajte više

Prvi čips

Slika
  Otac bi panulava najčešće u Lastovski kanal. Nas dicu i tetu bi isckrca na okolne male škoje da pribavimo nešto za izist. Ostavi bi nas na Lukovac ili Pržnjak Veli, Pržnjak Mali, Trstenik ili Gredicu. Nama je bilo svejedno jer nan je na svaken bilo puno lipo. Neka smo bili mali, svi smo jemali pošadu i znali smo kako u latenu poticu, jerbo ni bilo plastičnih kesa, skupjat puže grce i prilipke, oliti lumpare. Samo nebo zna koliko smo lumpara izili sirovih. A na svitu ni bilo bojega rizota od naših truda. Kad bi ga teta učinila i začinila kako triba. A mi bi, dok je otac lovija, učinili cili krug oko škoja. Kad bi nan bilo jadno vruće, samo bi skočili u more, rasladili se i nastavjali daje. Da smo tada gledali film Ralje, vjerojatno nan ne bi palo na pamet skakat di smo skakali. Ali film je, na svu sriću bi puno kašnje. Pa smo ronili ko će dubje i plivali ko će daje.   Jer mi smo tad imali malo godina. Ja jedinica i mojih troje kužina. Nerazdvojni. Za to vrime, teta se bav...
Pročitajte više